भिडियो हेर्न तलको बक्सभित्र किल्क गर्नुहोस

सन् २०१४ को फेब्रुअरीमा सत्य नादेलाले माइक्रोसफ्ट कम्पनीको प्रमुख कार्यकारी अधिकृतको कुर्सी सम्हाल्दा कम्पनीको अवस्था गिर्दो थियो । माइक्रोसफ्टको विन्डोज ८ अपरेटिंग सिस्टम एउटा ठूलै विपत्ति निम्ताइरहेको थियो । कम्पनीका कर्मचारीहरु पनि को भन्दा को ठूलो भन्दै पर्दा पछाडि संघर्षमा व्यस्त थिए । र उसैगरी उपभोक्ता तथा डेभलपर्सहरुको विश्वास पनि गुमिरहेको थियो ।

तर समय बदलिएको छ । अहिले दुइ वर्षपछि सन् २०१६ लागिसक्दा माइक्रोसफ्टले सबैलाई सफ्टवेयर तथा सेवा प्रदान गर्ने कम्पनीको रुपमा आफ्नो लय फेरि समातिसकेको छ । अनि एकताकाका शंकालु लगानीकर्ताहरुले उतारचढावहरु वास्तविक रहेछन् भन्ने कुरा बुझिसकेका छन् ।

अझैपनि माइक्रोसफ्टले गर्नुपर्ने कुरा धेरै छन् । तर माइक्रोसफ्टको अहिलेको सफलतामा मुख्य हात रहेका यसका सिइओ सत्य नादेलाको जिवन तथा करिअरलाई फर्केर हेर्ने हो भने निकै रमाइलो छ । भारतमा जन्मेका माइक्रोसफ्टका सिइओ नादेलाको उदयको कथा यस्तो छः

· सत्य नादेलाको जन्म सन् १९६७ मा भारतको हैदरावादमा भएको हो । उनका बाबु सरकारी जागिरे थिए र उनकी आमा संस्कृत भाषाकी प्राध्यापक थिइन् ।

· सानैदेखि नादेला व्यवसायिक क्रिकेट खेलाडि बन्न चाहन्थे र विद्यालय पढ्दा क्रिकेट खेले पनि । तर पछि उनले बुझे की विज्ञान र प्रविधिको क्षेत्रमा उनको लगाव खेल क्षमता भन्दा बढि रहेछ ।

· नादेलाले मनिपाल इन्स्िटच्युट अफ टेक्नोलोजीबाट सन् १९८८ मा इलेक्टि्रकल इन्जिनियरिंगमा स्नातक डिग्री हासिल गरे । उनले एकताका भनेका थिए, मैले चिजहरु बनाउन चाहन्थे भन्ने कुरा मलाई सधै थाहा थियो ।

· तर उनले सोँचे अनुसारको विषय पढ्नका लागि भारतमा कम्प्युटर विज्ञान विषय थिएन । त्यसैले उनी अमेरिकाको विस्कन्सिन मिलोकी विश्वविद्यालयमा भर्ना हुन गए र त्यहाँबाट सन् १९९० मा ग्रयाजुएट गरे ।

· नादेलाले त्यसलगत्तै सिलिकन भ्यालीको चर्चित कम्प्युटर सर्भर कम्पनी सन माइक्रोसिस्टम्समा काम गर्न थाले ।

सन् १९९२ मा नादेला माइक्रोसफ्ट कम्पनीसँग जोडिए । उक्त समयमा संस्थापक बिल गेट्स नै सिइओ थिए र विन्डोज अपरेटिंग सिस्टमले विश्वव्यापी श्रेष्ठताको दौड भर्खरै सुरु गरेको थियो ।

· माइक्रोसफ्टमा काम गर्ने जम्मा ३० जना भारतीय आप्रवासीमध्ये नादेला पनि एक थिए । माइक्रोसफ्टमा उनको पहिलो परियोजना माइक्रोसफ्टको दुर्भाग्यशाली इन्ट्रयाक्टिभ टिभी प्रडक्ट र विन्डोज एनटी अपरेटिंग सिस्टम थियो ।
· माइक्रोसफ्टमा जागिर सुरु गर्दाको पहिलो वर्ष नै नादेलाले आफ्ना सहकर्मी तथा हाकिमहरुलाई प्रभावित गर्न सफल भए । उनले सन् १९९७ मा युनिभर्सिटी अफ सिकागोबाट एमबीए पनि उत्तीर्ण गरे ।

· सन् १९९९ मा माइक्रोसफ्टले नादेलाको बढुवा गर्यो र पहिलोपटक उनलाई कार्यकारी भूमिका प्रदान गर्यो । उनी माइक्रोसफ्ट बी सेन्ट्रलको उपाध्यक्ष बनाइए । यो ममाइक्रोसफ्टको वेब सर्भिस थियो जसले साना व्यवसायीका लागि वेबसाइट तथा इमेल होस्टिंग गर्दथ्यो ।

· सन् २००० मा बिल गेट्सले छाडेपछि माइक्रोसफ्टमा स्टिभ बाल्मर सिइओ बने ।

· सन् २००१ मा सत्य नादेलाको फेरि महत्वपूर्ण बढुवा भयो । माइक्रोसफ्ट बिजनेस सोलुसन्सको कर्पोरेट उपाध्यक्षमा बढुवा भए उनी । यो विभाग विभिन्न अन्य कम्पनीहरुलाई खरीद गरिसकेपछि गाभेर बनाइएको थियो र यसले साना तथा मझौला व्यवसायहरुका लागि एकाउन्टिंग सफ्टवेयर बनाउँदथ्यो । साथै यसले सेल्सफोर्ससँग प्रतिस्पर्धा गर्दै क्लाउड बेस्ड सिआरएम पनि बनाइरहेको थियो । र यी सबै प्रडक्टहरुलाई डाइनामिक्स नाममा रिब्रान्डिंग गरिनेवाला थियो ।

· नादेलाको प्रगति उकालो लागिरह्यो । सन् २००७ मा उनी माइक्रोसफ्टको अनलाइन सर्भिसको वरिष्ठ उपाध्यक्ष बने । उनी बिंग सर्च इन्जिनका साथै माइक्रोसफ्ट अफिसको सुरुवाती अनलाइन भर्सन र एक्सबक्स लाइभ गेमिंग सर्भिसको प्रमुख बने ।

· सन् २०११ मा नादेलाको फेरि बढुवा भयो र उनी सर्भर एण्ड टुल्स डिभिजनको अध्यक्ष बनाइए । यो विभागले निकै महत्वपूर्ण तथा महत्वाकांक्षी परियोजनाहरु संचालन गरिरहेको थियो ।

· नादेलाले उक्त विभाग सम्हाल्दा त्यसको वाषिर्क आम्दानी १६ अर्ब ६० करोड डलर थियो । तर २ वर्षभित्रमै नादेलाले आम्दानी २० अर्ब ३० करोड डलरमा पूराइदिए ।

· तर त्यस समयमा माइक्रोसफ्टमाथि विभिन्न संकट आइलागेका थिए । पर्सनल कम्प्युटरको क्षेत्रमा विन्डोज ८ सबैभन्दा ठूलो विपद बनेको थियो । आइफोन तथा एन्ड्रोइड फोनले विन्डोज फोनलाई निकै तिव्र गतिमा पछि पारिरहेका थिए भने गुगल सर्च इन्जिनको दबदबामा बिंगले छेउसम्म पनि समाउन सकेको थिएन । यस्तोमा सिइओ बाल्मर निकै आलोचित बनिरहेका थिए ।

· सन् २०१३ को अगष्टमा सिइओ बाल्मरले आफुले राजिनामा दिने घोषणा गरे । त्यसपछि माइक्रोसफ्टमा नयाँ सिइओको खोजी भयो । नयाँ सिइओ छनोट समितिमा बाल्मर र बिल गेट्स थिए ।

· धेरै अफवाह र अनुमानका बीच सन् २०१४ को फेब्रुअरीमा माइक्रोसफ्टले सत्य नादेलालाई नयाँ सिइओ घोषणा गर्यो ।

· संकटमा रहेको कम्पनीलाई उकास्नका लागि अभिप्रेरित गर्न माइक्रोसफटको बोर्डले पहिलो वर्षका लागि ८ करोड ४० लाख डलरको क्षतिपूर्ति प्याकेज पनि घोषणा गर्यो ।

· पहिलोपटक सिइओको कुर्सी सम्हालेसँगै नादेलाले माइक्रोसफ्टका सबै कर्मचारीलाई एउटा इमेल पठाए । जसमा लेखिएको थियोः म ४६ वर्षको भएँ । मैले २२ वर्षअघि बिहे गरेको हुँ र ३ जना बच्चा छन् । र अरु सबैको जस्तै मैले जे गर्छु र जे सोँच्छु त्यसमा धेरै भूमिका मेरो परिवार तथा समग्र जिवनको अनुभवले खेल्दछ । मलाई चिन्ने धेरैले भन्छन् की म आफ्नो उत्सुकता तथा जान्ने तिर्खाबाट परिभाषित छु । मैले आफुले पढ्न भ्याउने भन्दा बढि किताब किन्छु । मैले भ्याउने भन्दा बढि अनलाइन कोर्समा साइन अप गर्छु । मेरो आधारभुत विश्वास के छ भने यदि तपाइँले नयाँ चिज सिकिरहनुभएकेा छैन भने तपाइँले महान तथा उपयोगी चिज गर्न सक्नुहुन्न । त्यसैले परिवार, उत्सुकता तथा ज्ञानको भोक सबैले मलाई परिभाषित गरिरहेका छन् ।

· नादेलाले सिइओ बनेको छोटो समयमै कम्पनीमा केही ठूला परिवर्तन गरेर कर्मचारीको मन जिते । अनि गुमेका उपभोक्ता फर्काउन तथा कम्पनीलाई लयमा फर्काउने कोसिस गरे ।

· नादेलाले कुनैबेला सोँच्न पनि नसकिने मानिएको प्रतिस्पर्धी लिनक्स अपरेटिंग सिस्टमलाई माइक्रोसफ्ट एजर क्लाउडमा आबद्ध गरे ।

· एप्पलको आइप्याडका लागि माइक्रोसफ्ट अफिस ल्याए ।

· चर्चित गेम मिनिक्राफ्ट निर्माण गर्ने मोजांग स्टुडियो खरीदमा अढाइ अर्ब खर्चिर्ए ।

· माइक्रोसफ्ट आउटलुक जस्तो फस्टक्लास आइफोन तथा एन्ड्रोइड एप्सहरु ल्याए ।

· विन्डोज ९ मा नगैकन निकै उत्कृष्ट तथा नयाँ सोँच सहितको विन्डोज १० सार्वजनिक गरियो ।

· कम्पनीको पहिलो ल्यापटक माइक्रोसफ्ट सर्फेसबुक सार्वजनिक गरियो ।

· कम्पनीको पहिलो होलोग्राफिक चस्मा माइक्रोसफ्ट होलोलेन्सको निर्माण गरियो ।

· नादेलाको दर्शन यस्तो छ की उनी माइक्रोसफ्ट सफ्टवेयर तथा सर्भिसहरु सबै उपभोक्तासम्म पुग्न सकून् चाहे उनीहरु विन्डोज प्रयोग कर्ता बाहेकका किन नहोउन् । यसका लागि उनीले अन्यसँग सहकार्य गर्नुपर्छ भन्ने मान्यता राख्छन् । त्यसको पहिलो प्रयास स्वरुप उनले क्वालकोमका पूर्व कार्यकारी पेग्गी जोन्सनलाई माइक्रोसफ्टमा भित्राए । अहिले उनी कम्पनीको बिजनेस डेभलपमेन्ट विभागकी उपाध्यक्ष छिन् र अन्य कम्पनीसँग सहकार्य गर्ने जिम्म ाउनको छ ।

· सन् २०१५ मा आफ्नो सबैभन्दा मनपर्ने माइक्रोसफ्ट एप देखाउनका लागि एक कार्यक्रममा नादेलाले स्टेजमै आइफोन प्रदर्शन गरे ।

· नादेला व्इस्त छन् र लगानीकर्ताहरुले यो मन पराएका छन् । जसका कारण नै होला सन् २०१४ मा माइक्रोसफ्टको शेयर १४ प्रतिशतले तथा २०१५ मा २१ प्रतिशतले बढ्यो ।

· नादेलाका सामुन्ने अहिलेपनि चुनौतिहरु कम छैनन् । स्मार्टफोन बजारमा माइक्रोसफ्टले अझैपनि संघर्ष गरिरहनुपरेको छ । पर्सनल कम्प्युटरको बिक्रिमा आएको गिरावटले विन्डोज १० को लक्ष्यमा बाधा उत्पन्न गरिरहेको छ । एक्सबक्स वन भिडियो गेमले सोनीको प्लेस्टेसन फोर सँग जुध्नु परिरहेको छ ।

तर लामो समयपछि पहिलोपटक माइक्रोसफ्टका लागि धेरै विषयहरु सकारात्मक देखा परेका छन् ।